14 mart 2026-cı il tarixində Masallı Dövlət Regional Kollecinin direktoru Rövşən Qurbanov və kollecin bir qrup əməkdaşları Vətən müharibəsi uğrunda gedən döyüşlərdə şəhid olan Masallı Dövlət Regional Kollecinin tələbəsi Salyan rayonundan olan şəhid  Kərimov Ağamoğlan Yusif oğlunun, Cəlilabad rayonundan olan şəhid İbrahimli Kənan Azad oğlunun və Masallı rayonundan olan şəhid Ağayev Ağamalı Şamil  oğlunun   məzarını ziyarət etdikdən sonra şəhidlərin ailə üzvləri ilə  görüşərək yaxınlarına başsağlığı veriblər.

  

Azərbaycan Silahlı Qüvvələrinin əsgəri olan Ağamalı Şamil oğlu Ağayev 1996-cı il sentyabrın 23-də Masallı rayonunun Çaxırlı kəndində anadan olub. O, 2020-ci ilin 27 sentyabrında başlanan Vətən müharibəsi zamanı Qubadlı, Cəbrayıl və Füzulinin azadlığı uğrunda gedən döyüşlərdə iştirak edib və oktyabrın 20-də Füzuli döyüşləri zamanı yaralı hərbi qulluqçunu döyüş meydanından çıxaran zaman erməni tərəfinin snayper gülləsi nəticəsində şəhid olub.Ağamalı Ağayev göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.

Azərbaycan ordusunun əsgəri olan Kərimov Ağamoğlan Yusif oğlu 18 aprel 2002-ci ildə Salyan rayonunun Xocalı kəndində anadan olmuşdur. 2020-ci ilin 27 sentyabrında başlanan Vətən müharibəsi zamanı Cəbrayıl, Laçın və Qubadlının azadlığı uğrunda gesən döyüşlərdə iştirak edib və 22 oktyabr 2020-ci ildə Qubadlı rayonu istiqamətində qarşı tərəfin diversiya qrupu ilə döyüş zamanı döyüş tapşırığını yerinə yetirərkən şəhid olmuşdur. Kərimov Ağamoğlan göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra 3-cü dərəcəli “Vətənə xidmətə görə” ordeni ilə, "Laçının azad olunmasına görə", “Cəbrayılın azad olunmasına görə" və "Qubadlının azad olunmasına görə" medalları ilə təltif edilib.

Azərbaycan Ordusunun əsgəri olan İbrahimli Kənan Azad oğlu 28 may 1999-cu ildə Cəlilabad rayonunun Adnalı kəndində anadan olmuşdur. 2020-ci ilin 27 sentyabrında başlanan Vətən müharibəsi zamanı Cəbrayılın, Füzulinin və Xocavəndin azadlığı uğrunda gedən döyüşlərdə vuruşmuşdur. Xocavənd rayonunun Hadrut qəsəbəsi istiqamətində döyüş tapşırığının yerinə yetirilməsi zamanı şəhid olmuşdur. İbrahimli Kənan göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra 3-cü dərəcəli “Vətən uğrunda", “Cəsur döyüşçü”, “Xocavəndin azad olunmasına görə", “Cəbrayılın azad olunmasına görə", "Füzulinin azad olunmasına görə" və  "Şuşanın azad olunmasına görə" medalları ilə təltif edilib.

Allah Şəhidlərimizə rəhmət etsin, ruhları şad olsun!