16 mart 2026-cı il tarixində Masallı Dövlət Regional Kolleci və “Xocalı Soyqırımını Tanıtma” İctimai birliyinin birgə təşkilatçılığı ilə Nizami Gəncəvi adına Mədəniyyət evində “Baharın rəngləri-Novruz festivalı” adlı tədbir keçirildi. 

Festivalda Masallı Dövlət Regional Kollecinin kollektivi, təhsil İctimaiyyəti, müəssisə rəhbərləri, Azərbaycan Dövlət Pedaqoji Universiteti Cəlilabad rayon filialı, Cəlilabad Peşə Təhsil Mərkəzi və Astara Pedaqoji Kollecinin nümayəndələri və tələbələri iştirak etdilər. 

İlk öncə təşkil olunan milli-mənəvi dəyərlərin yaradıcılığına aid rəsm əsərlələri, əl işi nominasiyası, “Novruz baharın müjdəsi” adlı inşa nominasiyası və milli mətbəx ənənələrini əks etdirən sərgiyə baxış keçirildi.

Ulu Öndər Heydər Əliyevin və Şəhidlərin əziz xatirələri bir dəqiqəlik sükutla yad edilərək, Azərbaycan Respublilasının Dövlət Himni səsləndirildi.

Masallı Dövlət Regional Kollecinin direktoru Rövşən Qurbanov çıxış edərək bildirmişdir ki, Novruz bayramı xalqımızın ən qədim və ən sevilən bayramlarından biridir. Bu bayram baharın gəlişini, təbiətin oyanışını, yeniliyi və ümidləri simvolizə edir. Novruz insanlara birlik, mehribanlıq və paylaşma kimi dəyərləri xatırladır. “Baharın rəngləri – Novruz festivalı” da məhz bu gözəl ənənələri yaşatmaq və gələcək nəsillərə çatdırmaq məqsədi daşıyır. Belə tədbirlər tələbələrdə milli dəyərlərimizə sevgi və hörmət hissini daha da gücləndirir.

“Xocalı Soyqırımını Tanıtma” İctimai Birliyinin sədri, müharibə veteranı Şamil Sabiroğlu çıxış edərək bildirmişdir ki, Novruz bayramı xalqımızın mədəniyyətində xüsusi yer tutur. Bu bayram təkcə təbiətin oyanışı deyil, həm də insanların qəlbində yenilənmə, ümid və sevinc hissi yaradır. Bu gün keçirilən festival isə baharın gözəlliyini, milli mədəniyyətimizi və ənənələrimizi bir araya gətirir. Belə tədbirlər sayəsində biz öz köklərimizi daha yaxşı tanıyır və milli dəyərlərimizi yaşadırıq.

 

Sonra Yeni Azərbaycan Partiyasının Masallı rayon təşkilatının sədri Seyfəddin Əliyev, 2016-cı il aprel döyüşlərində şəhid olan Nurlan Əsgərli və 44 günlük Vətən müharibəsində şəhid olmuş İntiqam Əsgərli qardaşlarının anası Ziba ana, “Xocalı Soyqırımını Tanıtma” İctimai Birliyinin ağsaqqalar şurasının sədr müavini, müharibə veteranı Çingiz Bayramov və 44gunsavash.az saytının baş redaktoru, yazıçı publisist Mövsümağa Ədalətoğlu çıxış edərək Novruz bayramı münasibətilə xalqımızı ürəkdən təbrik etmiş, dövlətimizə qüdrət, elimizə birlik və rifah arzulamışlar. Qeyd etmişlər ki, Novruz bayramı xalqımızın qədim adət-ənənələrini, milli dəyərlərini və birlik ruhunu özündə yaşadan ən gözəl bayramlardan biridir. 

Daha sonra Masallı Dövlət Regional Kollecinin tələbələrinin ifasında əbədii-bədii kompazisiya səsləndirildi. 

Sonda bir qurup tələbələr Fəxri Fərmanla rəğbətləndirildilər.