Masallı rayonunda Ulu Öndər Heydər Əliyevin anadan olmasının 103-cü ildönümünə həsr olunmuş “Azərbaycanın siyasi, iqtisadi, hərbi qüdrətinin inkişafında Heydər Əliyevin rolu” mövzusunda geniş tərkibli konfrans keçirilib.

Tədbir Masallı Rayon İcra Hakimiyyəti, Yeni Azərbaycan Partiyası Masallı rayon təşkilatı və Masallı Dövlət Regional Kollecinin birgə təşkilatçılığı ilə gerçəkləşib.

Konfrans iştirakçıları əvvəlcə Ümummilli Lider Heydər Əliyevin abidəsini ziyarət edərək önünə gül dəstələri qoyub, onun əziz xatirəsini dərin ehtiramla yad ediblər. 

Daha sonra tədbir iştirakçıları “Şəhidlər” abidə-kompleksini ziyarət edərək Azərbaycanın müstəqilliyi, suverenliyi və ərazi bütövlüyü uğrunda canlarından keçmiş Vətən övladlarının xatirəsini ehtiramla anıblar.

Tədbir öz işini Heydər Əliyev Mərkəzində davam etdirib. İştirakçılar əvvəlcə Mərkəzin foyesində Ümummilli Liderin həyat və fəaliyyətini əks etdirən foto və sənədlərdən ibarət sərgi ilə tanış olublar. Sərgidə Heydər Əliyevin müxtəlif dövrlərdə həyata keçirdiyi mühüm dövlətçilik siyasətini və Azərbaycanın inkişafına verdiyi töhfələri əks etdirən materiallar nümayiş etdirilib.

Konfrans başlamazdan əvvəl Azərbaycan Respublikasının Dövlət Himni səsləndirilib, Ulu Öndərin və Azərbaycanın ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla yad edilib.

Tədbirdə çıxış edən Masallı Rayon İcra Hakimiyyətinin başçısı Araz Əhmədov, Yeni Azərbaycan Partiyası Masallı rayon təşkilatının sədri Seyfəddin Əliyev, Milli Məclisin deputatı Məşhur Məmmədov, YAP Mərkəzi Aparatının məsul işçisi Əli Axundov öz çıxışlarında bildiriblər ki, Ulu Öndər Heydər Əliyev zəngin və mənalı ömrünü xalqına və dövlətinə həsr etmiş, müasir müstəqil Azərbaycanın qurulmasında və inkişafında müstəsna rol oynamışdır. Qeyd olunub ki, onun uzaqgörən və qətiyyətli siyasəti nəticəsində ölkədə siyasi sabitlik bərqərar olmuş, iqtisadi inkişafın əsası qoyulmuş və Azərbaycan beynəlxalq aləmdə layiqli mövqe qazanmışdır.

Çıxışlarda vurğulanıb ki, bu gün Prezident İlham Əliyevin rəhbərliyi ilə Heydər Əliyev siyasi kursu uğurla davam etdirilir. Nəticə etibarilə Azərbaycan sürətli sosial-iqtisadi inkişaf mərhələsinə qədəm qoymuş, ölkənin müdafiə qabiliyyəti daha da gücləndirilmiş, əhalinin rifah halının yüksəldilməsi istiqamətində mühüm addımlar atılmışdır. Xüsusilə şəhid ailələrinə və müharibə əlillərinə göstərilən diqqət və qayğının dövlət siyasətinin əsas prioritetlərindən biri olduğu qeyd edilib. Eyni zamanda, xalq-iqtidar birliyinin ölkənin bütün sınaqlardan uğurla çıxmasının başlıca amili olduğu diqqətə çatdırılıb. İşğaldan azad edilmiş ərazilərdə həyata keçirilən genişmiqyaslı bərpa və quruculuq işləri, eləcə də “Böyük Qayıdış” proqramının icrası Ulu Öndərin ideyalarının bu gün də uğurla davam etdirildiyini əyani şəkildə nümayiş etdirir.

Konfransda həmçinin Masallı Dövlət Regional Kollecinin direktoru, filologiya üzrə fəlsəfə doktoru Rövşən Qurbanov “Azərbaycan tarixinin əbədi imzası”, Astara Pedaqoji Kollecinin direktoru, filologiya elmləri doktoru, professor Kamran Kazımov “Heydər Əliyev və müstəqil dövlət quruculuğu”, Lənkəran Dövlət Universitetinin Tarix və onun tədrisi kafedrasının müdiri, dosent Kamal Mahmudov “Ulu Öndər Heydər Əliyevin Azərbaycanın memarlıq sahəsinin inkişafında rolu”, Azərbaycan Dövlət Pedaqoji Universitetinin Cəlilabad filialının baş müəllimi Fuad Mürsəlli isə “Azərbaycan gəncliyi etibarlı gələcəyimizdir” mövzularında məruzələrlə çıxış ediblər.

Natiqlər öz çıxışlarında bildiriblər ki, Heydər Əliyevin dövlətçilik ideyaları bu gün də aktuallığını qoruyur və Azərbaycanın davamlı inkişafının ideoloji əsasını təşkil edir. Onun müəyyən etdiyi strateji xətt ölkəmizin siyasi sabitliyinin, iqtisadi tərəqqisinin və hərbi gücünün möhkəmlənməsində mühüm rol oynayır. Xüsusilə gənclərin vətənpərvərlik ruhunda tərbiyə olunması, milli-mənəvi dəyərlərə bağlılıq və dövlətə sədaqət kimi amillərin gələcək inkişaf üçün mühüm əhəmiyyət kəsb etdiyi vurğulanıb.

Konfrans bədii hissə ilə davam etdirilib. Tədbirin sonunda rayonun ictimai-siyasi həyatında, eləcə də konfransın işində fəal iştirak edən bir qrup şəxsə fəxri fərman və xatirə hədiyyələri təqdim olunub.