Aprelin 29-da Masallı Dövlət Regional Kolleci və Masallı Tarix-Diyarşünaslıq Muzeyinin birgə təşkilatçılığı ilə “Şəhidlər Vətənin zəfər rəmzidir “ adlı layihənin növbəti aylıq tədbiri keçirilib.      

Birinci Qarabağ və Vətən Müharibəsi  zamanı torpaqlarımızı işğaldan azad edilməsi uğrunda canından keçən şəhidlərin xatirəsinin yad edilməsi məqsədilə keçirilən tədbirdə  şəhid ailələri, müharibə veteranları, qazilər,  mədəniyyət işçiləri, gənclər və tələbələr iştirak edib.  

İlk öncə vətənin azadlığı və suverenliyi uğrunda canından keçən şəhidlərin əziz xatirəsi bir dəqiqəlik sükutla yad edilib.

Tədbiri giriş sözü ilə açan muzeyin direktoru Əntiqə Tağıyeva çıxış edərək layihənin məqsədi və aprel ayında   anım günləri olan rayon şəhidləri, onların həyat və döyüş yolu haqqında geniş məlumat verib.

Sonra Masallı Dövlət Regional Kollecinin direktor müavini Dilarə Hüseynova, Vətən Müharibəsi iştirakçıları və şəhid ailələri ilə işin təşkili şöbəsinin baş məsləhətçisi Nurlan Muradov,  Lənkəran-Astara Regional Mədəniyyət İdarəsinin Masallı rayon üzrə nümayəndəsi Salman Yunusov və ehtiyatda olan baş gizir Əmək, müharibə və Silahlı Qüvvələr Veteranlar təşkilatının sədr müavini Ədalət Hüseynov çıxış edərək bildiriblər ki,

Vətənimizin müstəqilliyi, torpaqlarımızın azad olunması naminə ölümü gözə alan gənclərimiz bu müqəddəs amal uğrunda şəhid olursa, bu xalqımızın böyüklüyüdür. Şəhid verməyən xalqın mənliyi olmaz. Şəhid qanı axmayan torpaqdan Vətən olmaz.  Bizim xalqımız Vətəninə, torpağına bağlı qəhrəmanlar yetişdirən xalqdır.

İgid qardaşlarımızın 30 il ərzində göstərdikləri qəhrəmanlıq, düşmən təxribatının qarşısını alarkən canından keçən nə qədər mərd oğullar fəda verdik. Çətinliklərə baxmayaraq düşməni bir addım da irəli buraxmamaq üçün son damla qanlarına kimi vuruşdular. Otuz il ərzində qorxu duymadan, ürəklərində böyük Vətən sevgisi ilə qəhrəmancasına döyüşən hər bir Vətən oğulları bir daha sübut etdilər ki, bu xalqın qəhrəmanları yüzlərlə, minlərlədir. Onların hər birinin ömür yolu gənclərimizə nümunədir.

Şəhidlər ölməz, unudulmaz! İllər keçsə də, gələcək nəsillər onları hər zaman böyük minnətdarlıq duyğusu ilə yad edəcəklər. Şəhidlərin davamçısı varsa, xatirələri hər yerdə anılırsa, deməli, onlar ölməyib, ürəklərdə daim yaşayırlar. Hər birimizin vətəndaşlıq borcudur ki, şəhidlikləri ilə bizə qələbə sevinci yaşadan bu oğullarımızı daim qəlbimizdə yaşadaq. Vətən torpaqlarının ərazi bütövlüyünü bərpa edən hərbçilərimizə, əsgərlərimizə, canından keçən şəhidlərimizə, sağlamlığını itirən qazilərimizə, onların ailə üzvlərinə diqqət ayırmaq, qayğı göstərmək hər birimizin mənəvi borcudur.